Үнэ боломжийн л юм. Гэхдээ…

Хувцасны шошгон дээрх 100% cotton гэсэн бичгийг хараад бид тухайн хувцсыг хөнгөн, дулаан, биед эвтэйхэн гэж ойлгодог. Үнийн хувьд ч боломжийн байдаг болохоор худалдаж авахад юу нь буруу байх билээ? Гэхдээ 100% cotton - Бидний боддог шиг тийм ч эрүүл байдаггүй гэдгийг та мэдэх үү? 😳

Хөвөнгийн тариалан нийт газар тариалангийн 2.5%-ийг эзэлдэг ч хамгийн их бохирдолтой тариалангийн нэг юм. Дэлхий даяар ашигладаг шавьж устгах нийт бодисын 10%, пестицидын 5%-ийг хөвөнгийн тариалалт дангаараа хэрэглэдэг. (Эх сурвалж: www.icac.org International Cotton Advisory Committee)

Эдгээр бодис нь хэдийгээр ХАА-н бүтээгдэхүүний тариалалтад ач тустай боловч хөрс, гүний усанд шингэж байгаль орчныг бохирдуулахаас гадна хүнс, хувцсаар дамжин бие махбодид хуримтлагдаж хордуулан дархлааны системийг гэмтээж, харшил, экзем, янз бүрийн арьсны өвчлөл үүсэх шалтгаан болж байна. Хөвөнгийн тариалалт тийм байдаг байж. Тэгвэл хөвөнгөөс > хувцас болох үйл явц хэрхэн явагддаг вэ? 

Хөвөн боловсруулах процесс:

• Хурааж авсан хөвөнг хог шорооноос салгаж цэвэрлэнэ.
• Дараа нь самнаж хөвөнгийн ширхгийг жигд бүтэцтэй болгоно.
• Хөвөнгөө ээрүүлийн машинаар ээрч утас болгож боловсруулна.
• Ээрсэн утсыг нэхэх буюу сүлжих аргаар даавуу болгон хувиргана.
• Даавуугаа угааж, цайруулаад, будганд оруулан даавууны өнгө, бүтэц, гадаргууг өөрчилдөг. Үүнд их хэмжээний ус, цайруулагч бодис, будагч бодис орно. Мөн даавууг зайлж угаасан химийн хүнд элемент шингэсэн бохир ус гол мөрөн, далайд цутгагдаж төдий хэмжээний бохирдол үүсгэдэг. 
• Хэрэглэгчдийн гар дээр ирээд, угаалгын машинаар угаагаад ч эдгээр бодис бүрэн арилдаггүй.

1кг даавуун хувцас бий болох хүртлээ

(1 цамц + 1 жинсэн өмд гэсэн үг):

• 0.5 - 1.5кг пестицид
• 50-100г цайруулагч бодис
• 50-150г будагч бодис
• 10,000-20,000л ус зарцуулж
• 3.8-7кг CO₂ ялгаруулж
• 40–55 кВт.цаг эрчим хүч хэрэглэж
• 60-90цагийн хөдөлмөр шаарддаг.

Нялх хүүхдийн арьс том хүнийхээс 3-5 дахин нимгэн, маш эмзэг мэдрэмтгий байдаг бөгөөд арьсны хөгжих үйл явц нь гурван нас хүртэл үргэлжилдэг. Тиймээс бид хүүхдэдээ тусгай зориулалтын саван, шампунь, тос зэргийг хэрэглэдэг. Гэвч хэчнээн сайн арьс арчилгааны бүтээгдэхүүн хэрэглэсэн ч улайлт, тууралт гарсаар байх нь хүүхдийн биед байнга хүрэлцэж байдаг өмсөж буй хувцастай нь холбоотой байж мэдэх юм. 

Харин органик хөвөн даавуу нь химийн бодисын үлдэгдэлгүй, зөөлөн бүтэцтэй байдаг тул нярай хүүхдийн хувцсанд хамгийн тохиромжтой сонголт юм. 🌱